तू नव्हतीस म्हणून काय दंगा केला

ढगही मुद्दाम गर्दी करून आले होते .                        
वाकुल्या करून आनंद जणू लुटत होते .
का  त्यांचा असा अघोरी डाव होता ,
 नेमका जेव्हा तुझा ठाव नव्हता .


भिजणारी पाखरेही मिश्किल हसत होती
उगाचच डोळ्यांना आज ती बोचत होती .
लाटांनीही का असा उच्छाद मांडला होता ,
मनातल्या तुफानानेही जेव्हा जोर धरला होता .

नभाला  ढगांची बरी साथ होती
येशील कदाचित उगीचच आस होती
तू नव्हतीस म्हणून काय दंगा  केला ,
एकटाच आसवांसवे  किनारा धुंडाळला .